Дигиталното време во кое живееме овозможи учењето на јазиците да биде поблиску од кога било. Со само неколку клика, можеме да ги вежбаме изговорот, граматиката или вокабуларот, каде и да сме. Апликациите за вежбање јазици станаа одлична алатка за сите што учат во школо или на курс, бидејќи овозможуваат секојдневен контакт со јазикот и го прават учењето полесно и повозбудливо.

Во Академија 26, често ги охрабруваме учениците да користат апликации за вежбање шпански и германски јазик, како дополнителен дел од процесот на учење. Овие дигитални алатки се вистинска поддршка за секој што сака секојдневно да остане во допир со јазикот, да повтори материјал или едноставно да се забавува додека учи.

Зошто вреди да користиш апликација покрај редовниот курс?

Апликациите ти овозможуваат да го одржиш контактот со јазикот дури и во денови кога немаш час. Можеш да повториш нови зборови додека пиеш кафе, да решиш кратка вежба во автобус или да го слушаш изговорот додека шеташ. Тоа е најлесен начин да создадеш секојдневна навика, а токму навиката е клучот за напредок. Затоа, во продолжение ти ги препорачуваме најдобрите апликации за вежбање на шпанскиот и германскиот јазик.

1. Duolingo

Duolingo е најпознатата апликација за учење јазици во светот. Нејзината предност е што учењето го претвора во игра – добиваш поени, достигнуваш нивоа и напредуваш со кратки, лесни вежби. Особено е корисна за повторување на основни зборови, фрази и кратки реченици на шпански и германски. Со својот динамичен дизајн, Duolingo те поттикнува секојдневно да ја отвораш апликацијата, а тоа создава навика што ја одржува динамиката во учење на јазикот.

2. Busuu

Busuu е апликација што го прави процесот на вежбање на јазикот поинтересен бидејќи овозможува директна интеракција со луѓе кои го зборуваат јазикот. Преку кратки дијалози, сценарија од секојдневниот живот и задачи за разбирање, можеш да го вежбаш шпанскиот и германскиот во практичен контекст. Една од најубавите карактеристики е тоа што корисниците можат да добијат корекции и совети од родени говорители, а тоа дава чувство на реална комуникација и мотивација кај учениците.

3. Memrise

Memrise е идеална за збогатување на вокабуларот и стекнување на природен изговор. Апликацијата користи кратки видеа со родени говорители на шпанскиот и германскиот јазик, што ти овозможува да го чуеш јазикот во реални ситуации. Комбинира игри за вежбање меморија, асоцијации и повторувања во интервали, со што го олеснува запомнувањето на новите зборови. За оние што учат шпански или германски на курс, Memrise е одлична придружна алатка. Со оваа алатка можеш да го слушнеш истиот збор или фраза што си ја учел на час, но во различен контекст.

4. Babbel

Babbel е апликација која се издвојува по тоа што нуди кратки и практични лекции за секојдневна употреба. Многу корисници ја сакаат затоа што објаснува граматички правила на разбирлив и систематски начин. Посебно е корисна за германскиот, бидејќи нуди многу примери за редослед на зборови, членови и глаголски форми. Преку реални дијалози и повторувања, помага да се стекне чувство за структурата на јазикот.

5. Anki

Anki е апликација базирана на дигитални картички што ја користи техниката на „повторување“, на начин што зборовите кои најлесно ги забораваш ти се прикажуваат почесто. Оваа метода е ефикасна и корисна за вежбање на вокабуларот кој знае да биде тежок за паметење. Можеш сам да си внесуваш зборови, изрази или реченици што ги учиш на час, и да ги повторуваш кога имаш време.

6. DW Learn German (Deutsche Welle)

Оваа апликација е создадена од германската јавна телевизија DW и претставува совршен спој на јазик и култура. Нуди интересни видеа, вести и квизови за различни нивоа, прилагодени на почетници и ученици од напредни нивоа. Освен што нуди можност за подобрување на граматиката и вокабуларот, таа ти овозможува да го запознаеш германскиот начин на живот, навиките и секојдневието на Германците.

7. HelloTalk

HelloTalk е апликација што го поврзува учењето со вистинска комуникација. Преку неа можеш да се допишуваш со луѓе од Германија или Шпанија кои сакаат да вежбаат други јазици. Освен текст, можеш да испраќаш и аудио пораки и да слушаш како навистина звучи јазикот во разговор. На тој начин стекнуваш самодоверба и навика да зборуваш, без да размислуваш на стравот од грешки.

Како правилно да ги користиш овие апликации?

Апликациите за вежбање јазици се создадени да го направат учењето подостапно, полесно и позабавно. Тие нудат флексибилност и разноликост, но вистинската разлика ја прави твојата упорност и желба.

• Одвој 10–15 минути дневно за кратки вежби.
• Повеќе слушај и повторувај, помалку преведувај.
• Комбинирај ги апликациите со редовните часови во Академија 26.
• Избери 1 или најмногу 2 апликации што ти одговараат, не сите одеднаш.

Комбинирај ја технологијата со часовите во Академија 26, и ќе видиш дека шпанскиот и германскиот можат да станат дел од твоето секојдневие, без да почувствуваш напор.

Аплицирајте

Најчести прашања

Која апликација е најдобра за почетници?

Најдобро е да почнеш со Duolingo или Babbel. Тие се лесни за користење и имаат кратки и практични лекции.

Дали е погрешно доколку користам повеќе од две апликации одеднаш?

Не е погрешно. Сепак, подобро е да се фокусираш на една апликација, но да ја користиш редовно и со конкретна цел.

Дали преку овие апликации можам целосно да го научам јазикот?

Не. Тие се само алатки за вежбање и дополнување. Вистинскиот напредок доаѓа преку структурирана настава со професор.