Проф. Роберт Митров е основач и предавач во Академија 26. Дипломиран на Филолошкиот факултет во Скопје, на катедрата по шпански јазик и книжевност, Роберт повеќе од единаесет години ја споделува својата страст кон шпанскиот јазик и култура. Во ова интервју тој открива како изгледа еден негов час, како функционира онлајн наставата и што е најважно за вистински да се „почувствува“ шпанскиот јазик.

Како започна Вашата приказна со шпанскиот јазик и идејата за Академија 26?

Мојата приказна со шпанскиот започна како љубов на прв поглед. Кога првпат го слушнав имав само 6 години, а ме освои неговиот звук – мек, жив и топол. Најпрвин започнав да го изучувам на курс во далечната 2005 година, а отпосле се одлучив да го студирам на катедрата по шпански јазик и книжевност. По дипломирањето на Филолошкиот факултет, почнав да предавам и сфатив дека шпанскиот не е само јазик, туку начин на живот.

Академија 26 ја основав со идеја да создадам место каде што луѓето нема само да учат зборови и граматика, туку ќе го доживуваат јазикот низ културата, музиката и комуникацијата. Сакав часовите да бидат инспирација, а не обврска.

Како изгледа еден типичен час по шпански во Академија 26?

Наставата се одвива онлајн преку Zoom, двапати неделно по 90 минути, во текот на три месеци. Секој курс е внимателно структуриран, но истовремено динамичен и забавен.

Работиме по една од најдобрите програми за шпански јазик во светот. Секој час е збогатен со PowerPoint презентација, која содржи дијалози, интерактивни задачи, видеа, игри и кратки културни активности. Се обидувам да создадам атмосфера во која сите зборуваат, вежбаат и се смеат. Дури и почетниците од првиот час користат шпански – затоа што учиме преку комуникација, не преку суви правила.

Што најмногу ги изненадува учениците кога ќе почнат да учат кај Вас?

Најчесто им е изненадувачки колку брзо почнуваат да разбираат и да зборуваат. Многумина очекуваат да учат само граматика, но јас ги ставам веднаш во акција. Учиме преку реални ситуации: како да нарачаш во ресторан, како да купиш билет, како да зборуваш со пријател. Секој час има конкретна тема и комуникациска цел.

Еден од најубавите моменти е кога по неколку недели учениците почнуваат да сонуваат или да размислуваат на шпански – тоа е знак дека јазикот станал дел од нив.

Кој е Вашиот пристап во наставата – што Ве прави поразличен?

Моето мото е „учи со насмевка“. Верувам дека човек најмногу учи кога е опуштен и кога има позитивна енергија на часот. Секој мој час има структура, но и спонтаност – често импровизирам според енергијата на групата. Ги охрабрувам учениците да зборуваат, дури и кога грешат. Грешките се дел од процесот и токму преку нив доаѓа вистинското знаење.

Освен тоа, често вметнувам културолошки содржини. Зборуваме за музика, традиции, филмови, дури и гастрономија. Тоа е начинот јазикот да оживее и да биде дел од секојдневието.

Дали тоа значи дека шпанската култура има голема улога во Вашите часови?

Има огромна улога. Не можеш да го научиш шпанскиот без да ја почувствуваш шпанската култура. Тоа е јазик на емоции, гестови, ритам и боја.

Минатата година започнавме соработка со Шпанската амбасада во Скопје со која организираме часови и настани со културен карактер. На тие настани, учениците не само што имаат можност да зборуваат шпански со родени говорители, туку и го доживуваат духот на земјата. Тоа ги прави поуверени и ги мотивира да продолжат.

Онлајн наставата денес е сè поприсутна. Кои се нејзините предности според Вас?

Онлајн наставата е огромна можност. Им дава шанса на луѓето од различни градови и држави да учат заедно. Имам ученици од Скопје, Прилеп, Битола, но и од Валенсија, Малага, Тенерифе – односно нашинци коишто веќе живеат во Шпанија и сакаат да го подобрат нивното знаење по шпански.

Технологијата ни овозможува креативност: квизови, дигитални карти, споделени документи, видео активности. Денес можеш да го „посетиш“ Мадрид виртуелно за време на часот!

Со добра организација, креативен и интерактивен пристап, онлајн учењето не е дистанцирано – напротив, знае да биде многу забавно, лично и блиско.

Кои се најчестите предизвици на учениците, и како им помагате да ги надминат?

Најголемиот предизвик е стравот од зборување. Многумина мислат дека мора прво да научат „сè“ за да почнат да зборуваат, а тоа е погрешно.

Во мојата настава, зборувањето е во центарот на сè. Ги учам учениците да размислуваат на шпански, не да преведуваат од македонски. По неколку недели, сами забележуваат дека речениците почнуваат да им доаѓаат природно. Ги потсетувам дека јазикот е како инструмент – мораш да свириш за да напредуваш.

Кој е најубавиот момент во Вашата работа?

Секојпат кога ќе видам ученик кој со гордост зборува на шпански – тоа ми е најголемата награда.
Особено кога некој кој на почеток бил срамежлив, по неколку месеци води разговор со мајчин говорител. Тогаш знам дека сме направиле нешто повеќе од настава – сме создале самодоверба и љубов кон јазикот.

Како би ги охрабриле оние што размислуваат да почнат со учење на шпански?

Би им рекол: не чекајте совршен момент, почнете сега. Шпанскиот е јазик што ќе ви донесе радост, енергија и нови хоризонти. Не треба да имате талент – треба да имате љубопитност. А ние во Академија 26 ќе се погрижиме процесот да биде лесен, забавен и инспиративен.

Аплицирајте

Најчести прашања

Дали треба да знам нешто пред да се запишам?

Не, имаме групи за сите нивоа – почетници, средни и напредни.

Дали се издава сертификат по завршување на курсот?

Да, по завршениот курс добивате сертификат според Заедничката европска референтна рамка за јазици.

Дали во Академија 26 се организираат подготвителни часови за ДЕЛЕ (DELE) испитите?

Да, Академија 26 врши подготовка за ДЕЛЕ испитите на Институтот Сервантес. Овие часови се наменети за сите кои сакаат официјално да го потврдат своето знаење преку меѓународно призната диплома. Наставата е практична и фокусирана на реални задачи од испитот, со вежби што ги развиваат сите четири јазични вештини – слушање, читање, пишување и зборување.